 |
||
POLIMPOSAN |
||
Aya bantak ami ko kiapromasay ami ko kiandiorobasai sankai a kitab o Allāh [s.w.a] sa basa Mranaw na so kabaloy niyan a lalan ago okit ago kasankapan a makaoyat ko pizakatawan a pababatia a Muslim, sa kapanagontaman iyan sa kapaganada niyan ko basa o Qur’an a pakaasal a Arab, sabap sa di dn kasamporna so kaknala ko Qur’an inonta bo o so taw na masabot iyan sa nggolalan ko basa niyan a Arab, so agama Islam ago so Qur’an iyan a basa Arab na di dn anan makapmblag ka khakasiya a zakotowa a magpda a o mada so isa na khadadas mambo so isa on. Sabap san na giankanan a Diorobasa na sii ko kamataani ron na skaniyan na okit (wasilah) kna o ba skaniyan i antap a apta ko kaknala ko kitab o Allāh [s.w.a], sa amay ka mabaloy skaniyan a antap na mataan a skaniyan na galbk a di mapiya, sabap sa phakaogop ko kapnggarobata ko basa Arab o manga ridoay niyan a so ka garobata ko basa Arab na gioto dn so kagarobata ko Qur’an ago so Islam.
Madakl a panagontaman sa masa ini ko pirikharikhaban o doniya a ipphananawag o manga ridoay o Islam a aya goraok iyan na so kaawai ko basa Arab ago so langowan a Muslim na awaan iran so kaat a Arab sa itogalin iran so basa iran ko kipzoratn on ko kaat a Latin, ka an kon makalankap ko doniya sa kasabotan, ogaid na so bantak iran a marata a migagadong ko manga rarb iran na aya mabagr, sabap sa so kaat o basa o pagtaw na pd ko paninggalan iyan a toos ko kilala niyan (identity) na so kaat a Arab na tanda ko kaiislami ko pagtaw a phagosar on.
Pd sa patoray ko langowan a Muslim a kangglbk iran sa kapakabagr o giikapaganada ko kaat a Arab ago so kasabota on ka kagiya skaniyan i katotonkopan ko bagr o Agama niyan sa so Qur’an na di dn khatarotop so kasabota on ko kitogalin o basa niyan sa salakaw a basa.
Patot a tanodan a amay ka so Qur’an na osayin so manga ayat iyan sa nggolalan ko basa Arab, na so osayan iyan na aya ipmbtho ron na Tafsir, amay pman ka aya iniosay ron na salakaw a basa, na di khabthowan sa tafsir o Qur’an aya khibtho ron na diorobasa o Qur’an, na amay ka aya osayin sa salakaw a basa na so basa a diorobasa o Qur’an a kna o ba basa Arab, na aya khibtho ron na diorobasa o diorobasa o Qur’an, di dn khapakay oba tharoa a tafsir o Qur’an, sa madakl a pkharibat san ko manga pababatiya a aya pkhibtho iran on na tafsir kon o Qur’an a amay ka ilayin na diorobasa o Qur’an.
Gianan i bantak ami a phakisabotan ami ko kadandan a Muslim, ka oba iran panankapa sa ba kami pd ko manga taw a pphananawag ko kaawai ko basa Arab sa sambian sa salakaw a basa, aya bo a kiapharowa mi san na kagiya so kalankapan a Muslim na maito a pphakabatiya on sa Arab na araparap ami sa amay ka mabatiya iran ankai a kitab o Allāh [s.w.a] a skaniyan i bowalan o langowan a katao na oba kiran oto makasonggod sa kapanagontaman iran ko kapaganada iran ko basa o Qur’an a Arab.
Go sa taw a paganadn iyan so Islam ko salakaw a basa a knao ba Arab na di niyan khabaloy ankoto a taw a miaganad sa ba skaniyan mabaloy a alim ko agama Islam, mapiya pn i kadakl a miabatiya iyan a kitab a Islam a siabot iyan sa salakaw a basa, aya bo a khatawag a kominal (alim) ko kitab o Allāh [s.w.a] na so taw a piaganad iyan sa minggolalan sa basa Arab ka so Qur’an na di khatarotop so sabot on ago so madadalm on a manga kokoman amay ka di paganadn ko pakaasal a basa niyan a Arab. Sabap san na so kaoulamai sii ko Islam ago so kasabota ko basa Arab na di makapmblag ka magpda. Sa da a ulama o da a basa Arab sa datar oto a da a basa Arab o da a ulama.