 |
||
MANGA TAGOTAO AGO MAANA |
||
So pmbatiya ko manga hadith a pianothol iyan so sabap a kiapamanoron o manga ayat a matatago sa kababaan o oman i pandangan ankai a diorobasa, na khaoma niyan on ankai a manga kalimah sa patot a kasabotan iyan so thitho a mapipikir on, sa katii a piakarayag ami sii so manga maana niyan:
Sanad
Aya ptharoon a sanad na so kiasanday o thotol (hadith) ko kiapanothola on, ko taw a mianothol on, sa oman mialat so thotol ko isa a mianothol na maadn so pankat ankoto a thotol a bithowan sa Tabaqah, sataman ko kinidakatn (kinisoratn) sankoto a hadith.
Musnad
Skaniyan so hadith a miakazompasompat so kiapangasasanday niyan sa taman sa inisampay ko Rasūlullāh [s.a.w] sa da dn a miagalat on. Aya ibarat iyan na so hadith a piakambowat o al Bukhari a: Pianothol rkami o Abdullah Bin Yusuf a phoon ko Malik a phoon ko Abu az Zinad a phoon ko al A’raj a phoon ko Abu Hurayra a pitharo iyan a: So Rasūlullāh [s.a.w] na pitharo iyan a: Igira mininom so aso ko pananagoay o isa rkano na onabi niyan sa makapito.
Giankanan a hadith na miakazompasompat so kiasanday niyan ko miamanothol on ipoon ko Abdullāh na taman ko Rasūlullāh [s.a.w].
Mutawattir
Skaniyan so thotol (hadith) a pianothol skaniyan o miamanothol on ko oman i pankat o manga sanday niyan sa bilangan a tanto a madakl a di tharimaan o akal o ba siran maopakat ko kapamrak sa ba iran piangantang ankoto a hadith a pianothol iran.
Āhād
Skaniyan so hadith a so kadakl o miamanothol on na da samapayin ko kadakl o bilangan o miamanothol ko hadith a mutawattir.
Mash’hūr
Skaniyan so hadith a pianothol o tlo kataw a taw odi na kalawanan so kadakl iran – ko oman i pankat o kiasanday niyan – sa da sampayin ko dianka o kadakl o miamanothol ko hadith a mutawattir.
Azīz
Skaniyan so hadith a so mianothol on na da ma minos so kadakl iran sa dowa kataw sii ko langowan a pankat o kapkhasanday niyan sa taman ko kinidakatn on.
Garīb
Skaniyan so hadith a aya bo a mianothol on na sasakataw a taw, sii ko isa a pankat ko kiasanday niyan, mapia pn madakl a mianothol on ko sabaad a pankat o kiasanday niyan.
Sahīh
Skaniyan so thotol (hadith) a miakazompasompat so manga sanday o miamanothol on ipoon ko poonan iyan na taman ko kaposan iyan, a palaya siran mangaoontol ago khikasasarigan, sa daa minisogat on a shudud, ago illah. Aya ptharoon a shudud na so kasopaka o taw a kasasarigan ko lawan on a taw i kasasarigi ko kiapanothol. Aya illah na so kisogat o nganin a di marinayag sii ko kapipiya o hadith.
Mursal
Skaniyan so thotol (hadith) a so mianothol on na tabii (riaot iyan so sahabah a skaniyan na Muslim, ago miawafat skaniyan ko Islam) sa da nyan aloya so ngaran o sahabi a kiasandayan sankoto a thotol a pianothol iyan. So thotol a miakanggolalan sa Mursal, na malobay ago di khasanaan sii ko manga ulama ko Hadith.
Sii pman ko tlo a Imam, so Abu Hanifah, Malik, ago so Ahmad na thotol a khatarima ago mapia sa aya sharat na so mianothol on a tabii na kasasarigan, ago so sian-dayan iyan ko thotol iyan na kasasarigan. Sii ko As Shafiiyyah, na khatarima so Mursal amay ka nggolalan so manga sarat iran a pat.
Mu’dhal
Skanian so thotol (hadith) a kiagalatan sa dowa kataw a sanday odi na kasobraan, So Mu’dhal na hadith a malobay, ago marata i btad a di so hadith a Mursal ago so Munqati’. Sa di khatarima.
Munqati’
Skanian so thotol (hadith) a so manga sanday niyan na miangaada a da makazosophona sii ko apia antona okit. So munqati’ na di khatarima a hadith.
Maudhu’
Skaniyan so thotol (hadith) a piangantang a di bnar a inibangnsa ko Rasūlullāh [s.a.w]. Skaniyan i marata ko manga hadith ago di dn tharimaan.