 |
||
So Kaknala Sankai A Mus’haf (Qur’ān) A Maporo |
||
Inisorat ankai a Mus’haf ago inimpit so manga baris iyan ago so manga toos iyan sii ko kapakaaayon iyan ko thotol o Hafs Bin Sulaymān Ibn al Mugīrah al Asadī al Kūfī ko batiya o Āsim Bin Abī an Najūd al Kūfī at Tābiī a miakapoon ko Abdur Rahmān Abdullāh Bin Habīb as-Sulamī a miakapoon ko Uthmān Bin Affān ago so Alī Bin Abī Tālib ago so Zayd Bin Thābit ago so Ubayyi Bin Ka’b a miakapoon ko Nabī [s.a.w].
Go kinowa so kiptholadn ko manga bontal o batang iyan a miakapoon ko pianothol o manga ulamā ko kiptholadn ko manga batang (Ulamā ur Rasm) a miakapoon ko manga Mus’haf a so inipakawit skaniyan o al Khalīfah ar Rāshid Uthmān Bin Affān [r.a.] sii sa al Basrah ago sa al Kūfah ago sa as Shām ago sa Makkah, ago so Mus’haf a inibgay niyan ko manga taw sa Madīnah, ago so Mus’haf a inisnggay niyan sa ginawa niyan, ago so manga Mus’haf a kiopia a phoon on. Sa siniap sii sankoto so initogalin o dowa a Shaykh a so Abū Amr ad Dānī ago so Abū Dāūd Sulaymān Bin Nijāh, a rakhs o kapakarayag o ika dowa ko masa a kapakazopaka iran.
Sa langowan a batang a pd ko manga batang ankai a Mus’haf na makaaayon ko datar iyan ko manga Mus’haf a piakalankap o Uthmān a nm a miaona so kiaaloya on.
Go kinowa so okit a kiabarisi ron a phoon ko tiankd o manga ulamā ko kabaris sa makaayon ko miakambowat ko kitāb a at Tirrāz Alā Dhabt al Kharrāz a rk o al Imām at Tanasī a rakhs o kiakowaa ko manga toos (baris) o al Khalīl Bin Ahmad al Farāhīdī, ago so manga pd iyan a phoon ko manga ulamā sa sbangan. (al mashāriqah) a sambi o manga toos o manga taw sa al Andalus ago sa Magrib (al magāribah) a siran i pmbthowan sa manga isdpann.
Go inonotan ko kiabilanga ko manga ayat iyan so okit o manga taw sa Kūfah a miakapoon ko Abī Abdir Rahmān Abdillāh Ibn Habīb as Sulamī a miakapoon ko Alī Bin Abī Tālib [r.a.] a makaayon ko miakambowat ko kitāb a Nāzhimah az Zahr a rk o al Imām as Shātibī, ago so salakaw ron a pd ko manga kitāb a midadakat ko katao ko kapphanphda ko manga ayat o Qur’ān, na so manga ayat o Qur’ān ko okit iran na 6,236 a ayat.
Go kinowa so payagan o manga poonan o manga Juz’ (gintasan) iyan a tlo polo ago so manga Hizb (lompokan) iyan a nm polo ago so manga bagian o oman i Hizb a phapat a phoon ko kitāb a Gayth an Naf’ a rk o al Allāmah as Safāqusī, ago so kitāb a Nāzhimah az Zahr a rk o al Imām as Shātibī ago so osayan iyan, ago so kitāb a Tahqīq al Bayān a rk o Ashaykh Mohammad al Mutawallī ago so kitāb a Irshād al Qurrā’ wal Kātibīn a rk i Abū Īd Ridhwān al Makhalālātī.
Go kinowa so payagan o manga Sūrah ago ayat a initoron sa Makkah (Sūrah Makkiyyah) ago sa Madīnah (Sūrah Madaniyyah) sii ko payagan a igaganap ko kaposan o Mus’haf a phoon ko kitāb o Abū al Qāsim Umar Bin Mohammad Bin Abdil Kāfī ago so Kutub al Qirāāt wa at Tafsīr sa kazosopakan so sabaad on.
Go kinowa so payagan ko manga Waqf iyan (so pthargan ko kabatia) ago so manga toos iyan a phoon ko tiankd o sagorompong (Lajnah - Committee) ko manga kalilimod iyan a miaadn sabap ko kathamani sankai a manga Waqf, sa sii inilay ko mapangingindaw o manga maana a so miapayag on sa aya padoman iyan sankoto na so manga katharo o manga Imām a pd ko manga ulamā ko Tafsīr ago so manga ulamā ko kawaqf .
Go kinowa so payagan o manga Sajdah (Sujūd) ago so manga darpa iyan a phoon ko manga kitāb a Fiqhi ago so Hadīth a kazosopakan so lima on timan a da ami payaga ko kilid o Mus’haf a skaniyan so Sujud a ika dowa ko Sūrah al Hajj ago so manga ayat a Sojūd a miakambowat ko manga Sūrah a phakatalingoma: Sūrah Sād ago an-Najm ago al Inshiqāq ago al Âlaq.
Go kinowa so payagan ko manga darpa o Saktah (so kalimah a pphotoln on so lagam na di photoln so napas ko kapmbatiaa on) sa sii phoon ko Hafs a pd ko tindg o as Shātibiyyah ago so miamangosay ron, ago khaknal so okit a kipnggolalann on (kambthowa on) sa khakowa ko kapmbalsa on o manga goro ko kabatiaa ko Qur’ān (Tajwīd ).