 |
||
So Mbidaan O Katharo A Tafsīr Ago So Tarjumah (Diorobasa) |
||
Madakl a pkharibat ko kaphagosara ko kalimah a Tafsīr ago so Tarjumah diorobasa sii ko Qur’ān, aya ptharoon a Tafsīr na so kaosaya ko Qur’ān sa basa Arab, so pman so diorobasa (tarjumah) na so kapmaanai ko Qur’ān a basa Arab sa salakaw a basa a kna o ba basa Arab. Sabap san na so diorobasa o Qur’ān ko apia antonaa a basa a salakaw ko basa Arab na di khapakay a bthowan sa Tafsīr o Qur’ān, go so taw a mindiorobasa na di kabthowan sa Mufassir (pananapsir) aya khibtho ron na Padidiorobasa (mutarjim) amay pman ka inosay niyan so Qur’ān sa basa Arab odi na skaniyan na Ālim ko basa Arab ago so manga katao o Qur’ān (Ulūm al Qur’ān) na khatawag skaniyan a Mufassir amay ka tiafsir iyan so Qur'ān sa basa Arab, ogaid na so diorobasa niyan ko Qur'ān sa salakaw a basa, na aya ngaran iyan on na Mutarjim, kna o ba Mufassir.
Lalayon anan di kasasabotan sa masa ini balabaw a adn a manga taw a inosay ran so Qur’ān sa basa a salakaw, a da iran makowa sa mamantk ko basa Arab ka kna o ba siran Ālim ko basa Arab, ka aya katawan iran na so basa a inindiorobasa ko Qur’ān, a datar o basa English a diorobasa o Qur’ān na o pmaanai so English sa basa Mranaw a diorobasa o Qur’ān na giankanan a diorobasa na di khapakay a tharoon a Tafsīr o Qur’ān, go di pn khapakay a tharoon a diorobasa o Qur’ān aya khibtho ron na diorobasa o diorobasa o Qur’ān, ka kagia so mindiorobasa na di niyan katawan so pakaasal a basa Arab, ka o katawi niyan na di niyan diorobasaan so diorobasa o Qur’ān a salakaw a basa, sa giankanan diorobasa a datar anan na o masopak iyan so tafsīr o Qur’ān a basa Arab na aya khakowa na so tafsīr o Qur’ān a basa Arab, ago di kaphangndodan ko kakhowai ron sa manga Dalīl amay ka adn a makamomoayan a diorobasa o Qur’ān, ka so basa na oman mialat sa salakaw a basa na makawatan ko thitho a maana niyan a pakaasal na aya pn so Qur’ān a katharo o Allāh [s.w.a] a aya pagns iyan na aya bo’ a kakhatarotop o kasabota on na so kaknala ko basa Arab.
So katharo a “diorobasa” na aya pakaasal anan na basa a Malayu a Jurubahasa, aya maana niyan na so kapmaanai ko basa sa salakaw ron a basa, na kagia so Mranaw na da a batang iyan a “Jīm” ko pakaasal o Kirim sa pzambian iran so batang a “Ja” sa batang a “Da” na gioto i kiambaloy niyan a “Diorobasa”. Sii ko basa Ârab na Tarjumah, a giipmanaan o Mranaw sa siripiti odi na katogalin sa basa.