 |
||
SO KAATASAN O MINDIOROBASA |
||
Si Hassanor Bin Maka Alapa, na pd ko sarza a inimbabawata ko kiasbang o ragon a 1959, - matag anan arangan o manga loks ka di misosorat so tahun a kinimbawataan on - sii sa ingd a Linao, Kormatan, Madalum, Lanao del Sur. Piagoyagoyag skaniyan a wata a ilo, miawafat si ama iyan ko gawii a kinimbawataan on.
So kiapaganad iyan sa katao na miaori ko kalalayaman a omor o manga wata ko kapphakasolda kiran ko manga paganadan a English ago Arabic, sabap ko kiapagoyagoyaga on sa pagonayan, sa miaona makapaganad sa basa English, na go bo makasombak sa basa Arab ko paganadan a madrasah, ogaid na so kiapaganad iyan matiya sa kaat a Arab a kirim na miakakabalaga sii sa walay sabap ko kapphaka-batiaa on o ina iyan sa kirim a darangn a skaniyan na bolog dn a kalombayan, sa miabarasa ko kabatiya sa darangn a kaat a Arab ko da niyan pn kasombak sa madrasah, ago minilangag iyan so kadaklan on sa gioto i paganay a sinanad iyan sa walay a kiasabapan ko kiapakananaw o goagoay niyan sabap ko madadalm ko darangn a pd sa ongangn ago mapia a kambilangataw ago so kataid o basa a phagosarn on, sa pd oto a miakapagiasa on ko kiasinanad ko kabgay sa Khutbah (osiat) ko manga masjid ago so manga kalilimod a Islām, gowani a makalomang ko kiapaganad ko sinanad a Islām ago so basa Arab ko manga paganadan a madrasah sa ingd a Ranaw.
Sii ko pankat a Ib’tidāī (Primary) ko basa Arab na sii niyan miapaganad sa al Madrasah al Urfiyyah sa Kormatan, Madalum, na so Mutawassit (Preparatory) na sii sa Ma’had Mindanao al Arabī al Islamī sa Matampay, Marawi City, oriyan iyan na tomiogalin sa Ma’had Marawī al Islamī sa Dansalan, na ron iyan miapasad so Thanāwī (Secondary) oriyan iyan na pinili skaniyan a Ma’had Marawī a makalayag sa State of Kuwait ko kaphaganad sa katao sa pompongan a Kuwait University, na sii ko ragon a 1988, na kiadawagan sa daradat (Diploma) ko pankat a katao a Ijāzah al Huqūq (Bachelor of Laws & Islamic Sharī’ah ).
Oriyan iyan na lomiayag sa lopa a Hijāz, sa minggalbk a Executive Secretary sa Saudi Heart Charitable Foundation sa Jeddah, na da tanto malanggay so masa niyan roo, na lomiayag pman sa lopa a Kinānah (Misir) sa minggolalan sa Recommendation i Dr. Abdullāh Umar Nasīf a Secretary General sa Rabitah al Alam al Islamī (Muslim World Leauge) sa pantag sa kaphaganad sa katao sa Cairo University sa Post Graduate Studies a Faculty of Laws, na sii ko ragon a 1993, na miakambalingan sa lopa a Hijāz, na bigan pman i Dr. Umar Nasīf sa Recommendation ko kathnkayos maganad sa katao ko pankat a Doctoral (LL.D.) sa Pompongan a paganadan a International Islamic University Malaysia (I.I.U.M.) sa Kuala Lumpur, Malaysia, na miatarima a University so kaphaganad iyan sa katao ko Shari’ah Islāmiyyah ago so Qānūn, ogaid na da niyan masamporna so kaphaganad roo sa katao, sabap ko manga pd a balamban a di niyan ppharon so masa.
Madakl a manga kitāb a inipanorat iyan ago pindiorobasaan iyan sa basa Mranaw a bandingan ko Islām, ko kababaloy niyan a agama ago sosonan a iphagintaw sankai a doniya. Na aya mala a romasay niyan (Magnum Opus) na so kinisoratn iyan ago so kiandiorobasai niyan ko Qur’ān sa basa Mranaw a khabaloy a paninggalan a kitāb o manga taw sa Iranun, ko kapphaganada iran ko kitab o Allāh [s.w.a] a so Qur’ān.
Da a singayo iyan ko kaoyagoyag iyan a rowar sa kailaya niyan ko pandi o Islām a mipoporo sa gapa’ a Mindanao, sa makatindg so Parinta Islamiyyah ko ingd o manga Muslim sa lomankap so kipphananawagn ko Ingaran o Allāh [s.w.a] a lbi a Mahasuti a so "ALLĀHU AKBAR ".