Muqaddimah		مُـقََـدِّمـةٌ
LAPOY O SAGOROMPONG A SOMIALOSAW

Mataan a so kapkhasamporna o manga ala a galbk na di phakamo-ayan odi kathatabangai o manga taw a adn a mala a rantapan iran ko kapphamondas o mapiya a galbk.

Sa giankai a kitab na da roo matabiya, sa so kiapakamoayan iyan sa miailay niyan so sindaw na minggolalan sa tabang o manga pagariya ko agama. Isa a miakadawag sa mala a romasay ago tabang a tamok sankai a galbk na so pagari ko ko Islam a si Insan, Dato Pangalian Maniri, a skaniyan i miagiasa ko Computer a inosar akn ko paganay a kisoratn akn sankai a Diorobasa, oriyan iyan na pinggastowan iyan so kiasalosawa ko basa Mranaw a inosar akn on ko kianggalbka on o manga pagari ko ko ompongan a al Insan Islamic Assembly sii sa Marawi City.

So manga pagari ko ko ompongan a al Insan, a matatago siran sa lopa a Hijaz, ago sa Polo a Arabia, a da iran panganogoni so tamok iran ko kiaogop iran rakn sa kagaan a kapasad ankai a galbk, sa inidawag iran so tamok iran a sanang a maliwanag a pinggasto ko kiasalosawa sankai a kitab a miggolalan ko manga ala a Ulama sii sa Ranaw.

So sangat a maporo a slasla ago panalamat na indawag akn ko manga pagari ko ko agama a siran i isa a miaromasay ko kianggalbka ko kiasalosawa ago so kiaimpita sankai a diorobasa, sa minidawag iran so manga ala i arga ko manga masa iran ko kiasalosaw iran, minsan pn tanto a maninit so manga masa a middkha iran, sabap ko kadakl o manga galbk iran ko agama, na da iran dn panganogoni sa kiorban iran a sanang a maliwanag sankai a diorobasa ko kiasalosawa on, ka o ba limo so Allāh sa magaan a kitombok iyan sa misampay sa tangan o manga Muslim a khipananagontaman ko kapphakaolad o sabot iran ko kitab o Allāh. Giankoto a manga Ulama a sagorompong a somialosaw na siran si:

1. Dr. Elyas Hadji Ishaq
2. Dr. Ibrahim Abdul Karim
3. Dr. Abdussalam Disomimba
4. Dr. Faruk Abdurrashid
5. Alim, Mohammad Kamil Sultan

Di ko khalipatan so tabang a mala a inidawag rakn o kaka ko a si Dr, Mahid Mirato Mutilan, ko kiaogopi niyan rakn sa tamok ko gii ko kanggalbka sankai a diorobasa a kiasabapan sa gii ko kapakathoto-galin ko manga ingd a makasisiringan sa Pilimpinas a ron akn pkhakowa so sabaad a manga pasodan ago so manga ala a kitab ko tafsir, sii sa Malaysia, Indonesia, Singapore, ago so manga pd a ingd.

Pd a phanalamatan ko so kakasi ago sakotowa ko kaoyagoyag akn a si Ummu Ahlam, a siorog ako niyan ko manga masa a malitng ko gii ko kanggalbka sankai a kitab, a lalayon akn pkhaalampas so mapiya ko manga waqto niyan a di ko ron khibgay so kabnar iyan rakn pantag sa kassndod akn sankai a galbk, go so manga wata akn a pkhaogopan ako iran ko kaphagatora ko Computer ko kapthombok akn sa manga kopiya iyan.

Pphagarapn akn ko Allāh a Mahasuti a Maporo a pariyalaan iyan so panagontaman ankaya a manga pagari ko a somiorog a pamikiran, galbk, ago tamok ko kiasamporna ankai a Diorobasa o Qur’an sa basa Mranaw, sa mabaloyai a bts iran a sadaqah jariyah a phakaoma kiran so balas iyan sa alongan a maori.